Racconto d’estate

 

Era nu pomeriggi’‘e staggione ‘e tant’anne fà. Doppo magnato, dint’’a cuntrora,  me jette a mettere ncopp’o lietto pè me fa na durmutella. Ma sarrà pecché faceva nu caudo ca se schiattava, sarrà pecché na cicala ncopp’e platane faceva n’ammuina manco ‘e cane, nun fuje cazzo ‘e chiud’uocchie.

 

Allora m’aizaje, e ditto nfatto,  avutaje ‘a capezza ‘a bicicletta e  me ne jette a fà na partita a palle,  abbascio addò Scialone.

 

Quann’’arrivaje, putevano esse quase ‘e quatto, già ce steveno duje tavuline ca jacaveno a tressette sotto ‘a chianta ‘e fiche: ce steva Massimiello, Giuvann’’o rammaro, ‘o prufessore Piscatore e Michele Guerra ‘a na parte; Felice ‘e Mincone, Custantino, ‘o marisciallo Valentino e don Dario ‘a chell’ata.

 

Assettàte ncopp’’o scanno, già steveno aspettanno: ‘o sceriffo , Tonino Antinori,

‘o prufessore Buono e Pinuccio ‘o rammaro.

 

Zi’ Peppe ‘a riccia steva mmiezo ‘o campo e passava ‘o fierro, e tra na passata e n’ata diceva ‘a Vurpacchiella:

 

   -   Luì, miette n’ata cascia ‘e birre nfrisco dint’’e curze, ca ogge è dumméneca, sà

       quanta ggente vene?

 

   -   Zi Pè, aggia miso già ddoje casce, che n’abbasteno?

 

-   Miettene n’ata, siente a mme, ca chisti c’’a sete ca teneno, se vevessero pure ‘e 

curze!

 

M’assettaje vicino ‘o sceriffo e mentre parlavemo ‘e chesto ‘e chello, cu nu calore ca se sudava senza fa niente, se senteva ‘o  rummore d’’o fierro ca spanneva ‘a sabbia dint’’o campo, nu cardillo ca cantava ncopp’’a n’arbero, ‘a voce de’ tressettisti ca dicevano: Teng’‘a bbona, terzo liscio, sò piombo a nu palo, ccà nun ne tengo cchiù.

 

Pè tremente, a uno a uno comm’ ’e muonece, arrivava ‘o riesto d’’a cumpagnia: Fiore c’’a bicicletta, ‘o capufficio c’’a burzetella ch’’e palle perzunale a dinto, Aldo Cucciniello, Ninetto ‘e Girone, mastu Peppe scuppetta, Guido Ferri, Nicola ‘o pistolero. 

 

Quanno zi’ Peppe fernette ‘e passà ‘o straccio, s’avutaje nu poco attuorno e dicette:

 

-   Guagliù, cca simmo n’esercito, e chhiù ‘e doje squadre ‘e quatte nun putimmo fa.

-    Allora facimmo na cosa, facimmo ‘e giuvene contro ‘e viecchie, e ce jucammo na birra peròne a patrone e sotto - rispunnett’i’ ‘a copp’’a mano.

 

Zi Peppe vuttaje ‘a voce:

 

-    Chille ca sò d’accordo cu chello c’ha ditto  Riccardo, scennesseno dint’’o 

Campo. Chille ca nun so d’accordo, jesseno a jucà a tressette.

 

Facettemo ddoje squadre ‘e sei. C’’a squadra d’’e viecchie jeveno Zi Peppe ‘a riccia, Felice ‘e Mincone, mastu Peppe scuppetta e Custantino, mentre Guido Ferri e Fiore teneveno ‘a botta.

C’’a squadra d’’e giuvene jevemo ‘o prufessore Buono, ‘o sceriffo, ‘o pistolero e Pinuccio ‘o rammaro, mentre i’ e Aldo Cucciniello tenevemo ‘a botta.

 

Doppo na partita tirata fino ‘o spasemo, all’urdemo, Custantino tuzzaje na palla ncapa e ‘a cugliette….Accussì vincetteno ‘e vicchiarielle e facettemo subbeto ‘a menata p’’o “patronee e ‘o sotto”.

 

Ascette patrone zi’ Peppe e sotto Felice ‘e Mincone. Se facetteno purtà ‘e dudece birre, s’assettajeno ncopp’’o scanno e faccia a faccia, spilajeno ‘e birre, s’’e mettetteno mmiezo, zi’ Peppe ne pigliaje una mmano e dicette a zi’ Felice:

 

-   Sotto, i’ mmito sempe a si resta, e si quaccheduno dice “passo” o “nun ne voglio”, è  sempe  rrobba mia. Chesta birra a tte!

 

Zi’ Felice afferraje ‘a birra e s’’a vevette facenno una tirata, senza à fa pepetià manco nu poco. Po’ dicette:

 

-    A nomme ‘e San Francisco, chesta è ‘a primma ca và ‘o ffrisco!

 

Zi’ Peppe fece tale e quale. Po’ dicette:

 

-    A nomme ‘e San Biase, chesta è ‘a primma ca ce trase!

 

E accussì, a nomme ‘e San Francisco, e a nomme ‘e San Biase, a una ‘a vota, s’aizajeno tutt’’e dudece birre, e  ce mannajeno a “urmo” a tutte quante e ce facetteno murì c’’a puzza ‘e cravune.

 

-    Lassat’’e’j’ a chiste dduje, ca teneno ‘o sfunneco - alluccaje Michele Guerra    

     ca  steve jucanno a tressette.

 

Mastu Peppe scuppetta guardaje primma a Michele Guerra, po’ a zì Peppe e zì Felice, e doppo vuttaje ‘a sentenza:

 

    -     Ato che sfunneco, chiste so ncuttate ncuorpo, nun risenteno cchiù niente!!